Gela bat norberarena, Virginia Woolfen lanari jarraiki, ikus-entzunezkoei eta arte eszenikoei lotutako emakumeei zuzendutako egonaldi artistikoa da. Gariza Films etxeak, Lara Izagirre buru, 2017an sortu zuen proiektu hau, artistei sei hilabetez proiektu bat garatzeko aukera eskaintzeko helburuarekin eta behar ekonomikoak beteko diren sortze-espazio bat osatzeko asmoarekin.

Espazioa, denbora eta dirua da egonaldi honek eskaintzen duena, garatutako proiektuek, gero, bere bidea egin dezaten.

Prozesu

  1. Sei hilabete horietan zehar, ezartzen den gaiaren inguruko hasierako bilaketa-, dokumentazio- eta ikerketa-fase bat egongo da. Lehen fase horretan zehaztu egingo da bai proiektuaren formatua eta bai gaia. Beti emakumea istorioaren ardatz hartuta.
  2. Prozesuaren bigarren fasean, gidoia idatziko da. Lara Izagirrek jarraipen-lana egingo du idazte-prozesuan zehar.
  3. Azken fasean, gauzatutako proiektua ekoizteko aukerak baloratuko dira. Horretarako, finantziazioa bilatzeko aholkularitza eskainiko du Gariza Films etxeak. Eta, gainera, proiektuaren zuzendaritzari buruzko aholkularitza ere eskainiko du.

2023

Mikele Landa

Mikele Landa Eigurenek (Bilbo, 1995) Ikus-entzunezko Komunikazioko Gradua egin zuen UPV-EHU-n eta Suediako Karlstad Unibertsitateko zinema-fakultatean. Ondoren, Sormenezko Dokumentalgintzan, Zinema Esperimentalean eta bideoartean espezializatu zen Madrilgo TAI-n. 2021-2022 ikasturtean zehar Elías Querejeta Zine Eskolan Sorkuntza graduondoko ikaslea izan da.

Bere lehen lana, Heldu, Bilboko Zinebin aurkeztu zen (2018) eta zuzendari onenaren saria jaso zuen Euskal Zine Bileran (2019). Harrezkero, ikus-entzunezko proiektuak garatu ditu hainbat elkarterekin lankidetzan, hala nola Mali, 10 urtetan filma, OSALDErekin Malin grabatu, ekoitzi eta zuzendu zuena. Zinemagilea izateaz gain, kazetari bezala lan egin izan du EiTB-n eta Berria egunkarian, besteak beste.

Bere azken Lana, Noizko basoa, Donostiako Zinemaldian, Zinebin eta Punto de Vista jaialdietan aurkeztu berri du. Egun Senda, bere lehen luzemetraila, garatzen ari da Noka Mentoring, Elkarrekin Sortzen programetan, Gela Bat Norberarena.

2023

María Herrera

María Herrara (Madril, 1993) Kazetaritzan eta Komunitatean graduatu bikoitza. Madrilgo Carlos III.a Unibertsitatean Zientzia Politikoetan prestakuntza osagarria duen ikus-entzunezkoa. Mariak La Caixaren beka entzutetsu bat jaso zuen, New Yorkeko unibertsitate publikoan gidoi eta zuzendaritzan (MFA) zinema graduondoko bat egiteko. Gainera, NYko BAFTA Newcomers nazioarteko talentu programa ospetsuan hautatua izan da.

Fikziozko Film Labur Onenaren Goya Saria irabazi zuen ARQUITECTURA EMOCIONAL 1959ko ekoizle gisa. New Yorkera joan aurretik, Avalon ekoiztetxean lan egin zuen bost urte baino gehiagoz.

New Yorken La Caixa Fundazioaren laguntzarekin filmatutako THE OTHER WOMAN film laburra muntatzen amaitzen ari da. Eta bere bigarren film laburra filmatu berri du gidoilari eta zuzendari gisa UDAKO GAU BATEKO IPUINA, Olivia Delcán (“Isla Bonita”) eta Nacho Sánchez (“Mantícora”) protagonista dituena.

2022

Ainhoa Rodríguez

Ainhoa Rodríguez zuzendaria eta ekoizlea da. Zinematografia-analisian doktorea da. Bere lehen film luzea, Destello Bravío (2021), Rotterdamgo Nazioarteko Zinemaldiko Tiger Competition Sail Ofizialean estreinatu zen, eta MoMAk eta Film at Lincoln Centerrek 50. urteurrenean antolatutako New Directors/New Films in NY hautaketan parte hartu zuen. Zuzendari gisa, Zuzendaritza Onenaren Saria jaso zuen 26. edizioan (Vilnius IFF), Zuzendaritza Onenaren Saria 23. edizioan (SIWFF) eta Violette D ‘Or saria irabazi zuen Cinespaña Toulose jaialdian, besteak beste. Filma Mosku, Shanghai, FICUNAM (Mexiko Hiria), Salonica eta Sa pauloko Mostran aukeratu dute.

2018

Estibaliz Urresola

Ikus Entzunezko Komunikazioan lizentziatu zen UPV/EHUn. Bost urte Euskal Herriko telebista eta zinema industrietan lan egin zuen ospe handiko plataformetan: IBAIA – Ikus Entzunezkoen Euskal Ekoizle Burujabeen Elkartean, Donostiako Zinema Jaialdi Internazionalarekin elkarlanean edo BAINET ekoiztetxean, haien programen post-produkzio atalaren koordinatzaile.

2011an Bartzelonara doa, Zinema Zuzendaritza Masterra ESCAC-en egitera, idazketa eta zuzendaritzaren aldeko apostua eginez. ‘Adri’ bere laburmetraia tribunalak hautatua izango da urte horretan eta ESCAC FILMS-ek ekoiztua 2013an. 60 jaialdi internazional baino gehiagotan parte hartu du laburmetraiak atal ofizialetan dagoeneko, baita sei sari internazional irabazi ere.

Beka bat ere jaso zuen ESCAC-en Film Business Masterra burutzeko. Bitartean zuzendari laguntzaile eta skript ere lan egin zuen hainbat fikziozko luzemetraietan, eta laburmetrai eta klip musikal askotan. Bartzelonan igaro zuen denboraldi honen ostean, Donostiara bueltatzen da ‘Voces de papel’ lana idatzi eta zuzentzeko, mugimenduari buruzko entsegua.

‘Voces de papel’ da bere lehenengo luzemetraia, ETBrako egindako sormen dokumentala. Donostiako Zinemaldiko 60. edizioan estreinatu zen eta 2017an  urrezko txapela saria jaso zuen Bartzelonako Zinemaldia.cat  jaialdian.

 

GELA BAT NORBERARENA, Virginia Woolfen lan ezagunaren izenburuaz gain, GARIZA FILMS ekoiztetxeak deitzen duen egoitza artistikoaren izena ere bada, aurten nik lortu dudana zorionez.

Izan ere, sorkuntzaren munduan aritzea, ia-ia definizioz, hainbat oztoporen kontra aritzea baita. Horien artean bi dira nabarmenenak, sorkuntza librearen etsai nagusi: independentzia ekonomikorik eza, batetik, bizirauteko aukera emango diguten lan desberdinak izatera bultzatzen gaituena, lan ezegonkorrak gehienetan; horrek, aldi berean, beste faktorea bultzatzen du, denbora falta hain zuzen.

Zer esan gainera emakumeen kasu bereziaz, zeinak sorkuntzaren munduan -beste asko eta askotan bezala-, abiapuntutik bertatik aukeretara berdintasunean iristeko bermeak murriztuta izanda, korrika gehiago egin behar dugun helmuga berberera iristeko, lan gehiago egin behar dugun antzeko dirua jasotzeko, esfortzu gehiago egin behar dugun gauza bera erakustera emateko. Lasterketa neketsu bat, galtzeko diseinatua dagoena. Erruz dakigu hori gaur, eta hala zekien baita Virginia Woolfek 1929an, duela 90 urte “bakarrik”.

Hori dela eta suertatzen da hain egokia egoitza honen izena, helburu zehatzak dituena: espazioa, denbora eta dirua eskaintzea emakume sortzaile batek, 6 hilabetetan, bere proiektu propioa landu dezan.

Edizio honetan nik izan dut sortzaile hori izatearen zortea. Nire ideia landatu eta dedikazio osoz berau landu ahal izateko tokia izatearen zortea daukat, prozesu osoan zehar lagun hartuta.

Hala, eguna urratzen deneko haize gozoaren sentsazioarekin, gertu nago arrantza-sasoiari hasiera emateko, Woolfek bere lanaren lehen orrialdeetan hain eder dioen bezala, “pentsamenduaren kanabera ibaiaren isla eta belarretan hondoratzeko”, lehen hozkadak nire kanaberaren puntari desafio egin arte. Neure amu propioa bilatu beharko dut, neure sare propioak ehundu… Baina ez naiz bakarrik egongo.

Ibilbide honen amaieran kanaberari tira egin ahal izango diot, azaleratuko den kreaturaren izatea zein den jakiteko. Eta, orduan, Lara Izagirre eta Virginia Woolf (edo Mary Beton) eskertu beharko ditut, biak iritsi baitziren ondorio prosaiko berberera; hau da, idatzi ahal izateko, 500 libra behar direla urtean, eta norberarentzako gela bat, atean sarraila izango duena. Edo, gutxienez, ondo idatzi ahal izateko, konpromisoz eta arduraz.

2017

Naiara Carmona

Arte Ederretako Fakultatean (EHU) hasiko ditu bere ikasketak. Lehen zikloa bukatuta, arte eszenikoetara bideratuko da. Madrilgo Arte Dramatikoko Errege Goi Eskolan prestatuko da, testu-interpretazioko espezialitatean.

Aktore gipuzkoarrak Lara Izagirreren lehen film luzean parte hartuko du, Un otoño sin Berlín, Aneren pertsonaia sekundarioari gorputza emanez. Gainera, castingean lagunduko du eta haurren coach lanetan ere arituko da film berean.

 

 

Larak egonaldi honetan parte hartzeko proposamena egin zidanean, aukera paregabea iruditu zitzaidan idazten hasteko. Gariza Films etxeak eskaintzen duen programaren ezaugarriek bidea ematen didate proiektu bat baldintza hobeezinetan garatzeko.

Nire ustetan, lan-eskaintzarik ez izateak zuzeneko eragina du gaur egun emakumezko aktoreak sortze lanetan gehiago aritzean, beren proiektu propioak idatzi edo zuzentzen. Herrialde honetako aktoreen %90ak baino gehiagok ez du lortzen lanbide honetatik bizitzerik. Emakumeon langabezia-tasa gizonezkoena baino sei puntu handiagoa da eta, gainera, gutxiago irabazten dugu.

Langabezia-tasa altuaz gain, gure istorio propioak kontatzeko beharra ere badago,  ia-ia betebehar bilakatzen dena bizi dugun egoeran. Ikuskera femenino batetik kontatzea, eta baita fikzioan agertu ohi diren estereotipo femeninoak apurtuko dituzten pertsonaiak sortu eta antzeztea, normalean gizonezkoek sortzen dituztenak.

Lara Izagirre sen eta sentsibilitate ikaragarriko zuzendari eta gidoilaria da, eta sen horri esker zehatza eta zorrotza da aktoreak zuzentzen, non elkarrizketa etengabea ezartzen duen aktoreekin. Larak hain berezkoa duen entzuteko gaitasun horri esker, inprobisaziorako espazioa irekitzen da sortze-prozesuetan zehar; hori, nire ikuspuntutik, erremintarik baliotsuenetakoa da aktoreen sortzerako. Luxua da niretzat bera alboan izatea prozesu hau partekatzeko.

Si continuas utilizando este sitio aceptas el uso de cookies. Más información

Los ajustes de cookies de esta web están configurados para "permitir cookies" y así ofrecerte la mejor experiencia de navegación posible. Si sigues utilizando esta web sin cambiar tus ajustes de cookies o haces clic en "Aceptar" estarás dando tu consentimiento a esto.

Cerrar